ದುಬೈ: ಇರಾನ್ನಲ್ಲಿ ನಡೆಯುತ್ತಿರುವ ಭಾರಿ ಪ್ರತಿಭಟನೆಗಳಲ್ಲಿ ಮೃತಪಟ್ಟವರ ಸಂಖ್ಯೆ ಕನಿಷ್ಠ 5,000ಕ್ಕೆ ತಲುಪಿದೆ ಎಂದು ಇರಾನ್ನ ಸರ್ಕಾರಿ ಅಧಿಕಾರಿಯೊಬ್ಬರು ಆಘಾತಕಾರಿ ಮಾಹಿತಿ ನೀಡಿದ್ದಾರೆ. ಇದುವರೆಗೆ ಹೊರಬಂದ ವರದಿಗಳಿಗಿಂತ ಇದು ಅತಿ ಹೆಚ್ಚಿನ ಸಂಖ್ಯೆ ಆಗಿದ್ದು, ದೇಶದ ಒಳಗಿನ ಪರಿಸ್ಥಿತಿ ಎಷ್ಟು ಗಂಭೀರವಾಗಿದೆ ಎಂಬುದನ್ನು ಸೂಚಿಸುತ್ತದೆ.
ಈ ಸಾವುಗಳಲ್ಲಿ ಸುಮಾರು 500 ಮಂದಿ ಭದ್ರತಾ ಸಿಬ್ಬಂದಿಯೂ ಸೇರಿದ್ದಾರೆ ಎಂದು ಆ ಅಧಿಕಾರಿ ಸ್ಪಷ್ಟಪಡಿಸಿದ್ದಾರೆ. ಅಮಾಯಕ ನಾಗರಿಕರ ಸಾವಿಗೆ ಭಯೋತ್ಪಾದಕರು ಮತ್ತು ಶಸ್ತ್ರಸಜ್ಜಿತ ಗಲಭೆಕೋರರೇ ಕಾರಣ ಎಂದು ಆರೋಪಿಸಿರುವ ಅವರು, ವಿಷಯದ ಸೂಕ್ಷ್ಮತೆಯಿಂದ ತಮ್ಮ ಹೆಸರನ್ನು ಬಹಿರಂಗಪಡಿಸಲು ನಿರಾಕರಿಸಿದ್ದಾರೆ.
ವರದಿಗಳ ಪ್ರಕಾರ, ಇರಾನ್ನ ವಾಯುವ್ಯ ಭಾಗದ ಕುರ್ದಿಶ್ ಪ್ರದೇಶಗಳಲ್ಲಿ ಅತಿ ಹೆಚ್ಚು ಹಿಂಸಾಚಾರ ನಡೆದಿದೆ. ಇಲ್ಲಿ ಕುರ್ದಿಶ್ ಪ್ರತ್ಯೇಕತಾವಾದಿಗಳು ಸಕ್ರಿಯವಾಗಿದ್ದು, ಹಿಂದಿನ ಪ್ರತಿಭಟನೆಗಳಲ್ಲಿಯೂ ಇದೇ ಪ್ರದೇಶದಲ್ಲಿ ಹೆಚ್ಚು ಸಂಘರ್ಷಗಳು ನಡೆದಿದ್ದವು. ಜೊತೆಗೆ, ಪ್ರತಿಭಟನಾಕಾರರಿಗೆ ಇಸ್ರೇಲ್ ಮತ್ತು ವಿದೇಶಿ ಶಸ್ತ್ರಸಜ್ಜಿತ ಗುಂಪುಗಳು ಬೆಂಬಲ ಹಾಗೂ ಶಸ್ತ್ರಾಸ್ತ್ರ ನೀಡುತ್ತಿವೆ ಎಂದು ಇರಾನ್ ಅಧಿಕಾರಿ ಗಂಭೀರ ಆರೋಪ ಮಾಡಿದ್ದಾರೆ.
ಇನ್ನೊಂದೆಡೆ, ಅಮೆರಿಕ ಮೂಲದ ಮಾನವ ಹಕ್ಕುಗಳ ಸಂಸ್ಥೆ HRANA ಬಿಡುಗಡೆ ಮಾಡಿದ ವರದಿ ಪ್ರಕಾರ, ಇದುವರೆಗೆ 3,308 ಮಂದಿ ಮೃತಪಟ್ಟಿದ್ದಾರೆ, ಇನ್ನೂ 4,382 ಸಾವು ಪ್ರಕರಣಗಳು ಪರಿಶೀಲನೆಯಲ್ಲಿವೆ. ಡಿಸೆಂಬರ್ ಅಂತ್ಯದಲ್ಲಿ ಆರಂಭವಾದ ಈ ಪ್ರತಿಭಟನೆಗಳು ದಿನದಿಂದ ದಿನಕ್ಕೆ ತೀವ್ರವಾಗುತ್ತಿದ್ದು, ಸಾವಿನ ಸಂಖ್ಯೆ ಹೆಚ್ಚುತ್ತಿರುವುದು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಆತಂಕ ಮೂಡಿಸಿದೆ.
