ಆಫ್ರಿಕನ್ ವಂಚಕರು.. !!

ಬೆಂಗಳೂರು,ಜೂ.24-ಸೈಬರ್ ಅಪರಾಧಗಳನ್ನು ಮಾಡಲು ತ್ರಿಪುರಾದಿಂದ ನಕಲಿ ಸಿಮ್ ಕಾರ್ಡ್ ಹಾಗು ನಕಲಿ ಬ್ಯಾಂಕ್ ಖಾತೆಗಳನ್ನು ಸೃಷ್ಟಿಸಿ ನಗರಕ್ಕೆ ರವಾನಿಸಿಕೊಂಡು ಸಾರ್ವಜನಿಕರಿಗೆ ವಂಚಿಸುತ್ತಿದ್ದ ಆಫ್ರಿಕಾ ಮೂಲದ ಇಬ್ಬರು ಖತರ್ನಾಕ್ ಆರೋಪಿಗಳನ್ನು ನಗರದ ಈಶಾನ್ಯ ವಿಭಾಗದ ಸಿಇಎನ್ ಪೊಲೀಸರು ಬಂಧಿಸುವಲ್ಲಿ‌ ಯಶಸ್ವಿಯಾಗಿದ್ದಾರೆ.
ಆಫ್ರಿಕ ಮೂಲದ ಯಲಹಂಕದಲ್ಲಿ ಬಾಡಿಗೆಗೆ ಮನೆ ಮಾಡಿಕೊಂಡು ವಾಸವಾಗಿದ್ದ ಫಾಸೊಯಿನ್ ಅವಲೋಹೋ (32) ಹಾಗು ಆಡ್ಜೇ ಅಂಗೇ ಆಲ್ಫ್ರೇಡ್ ಅಡೋನಿ( 23) ಬಂಧಿತ ಆರೋಪಿಗಳಾಗಿದ್ದಾರೆ ಎಂದು ಡಿಸಿಪಿ ಡಾ.ಅನೂಪ್ ಎ.ಶೆಟ್ಟಿ ತಿಳಿಸಿದ್ದಾರೆ.
ಸಿಇಎನ್ ಪೊಲೀಸ್ ಠಾಣೆಯ ಸಿಬ್ಬಂದಿ ಖಚಿತವಾದ ಮಾಹಿತಿ ಪಡೆದು ನಕಲಿ ಸಿಮ್‍ಕಾರ್ಡ್ ಹಾಗು ನಕಲಿ ಬ್ಯಾಂಕ್ ಖಾತೆಗಳನ್ನು ಪಡೆದು ಸಾರ್ವಜನಿಕರಿಗೆ ವಂಚಿಸುತ್ತಿದ್ದ ಖಚಿತವಾದ ಮಾಹಿತಿ ಪಡೆದು ಆರೋಪಿಗಳನ್ನು ಬಂಧಿಸುವಲ್ಲಿ‌ ಯಶಸ್ವಿಯಾಗಿದ್ದಾರೆ.
ಆರೋಪಿಗಳು ಅಪರಾಧಗಳಿಗೆ ಬಳಸುತ್ತಿದ್ದ 4 ನಕಲಿ ಡೆಬಿಟ್ ಕಾರ್ಡ್‍ಗಳು ಮತ್ತು 4 ಸಿಮ್‍ಕಾರ್ಡ್‍ಗಳು ಮತ್ತು 3 ಮೊಬೈಲ್ ಗಳನ್ನು ದೊರೆತಿವೆ.
ವಿಚಾರಣೆ ನಡೆಸಿದಾಗ ತ್ರಿಪುರಾದಿಂದ ಕೊರಿಯರ್ ನಲ್ಲಿ ಬರುತ್ತಿದ್ದ ಮತ್ತೆರಡು ಪಾರ್ಸಲ್ ಬಗ್ಗೆ ಮಾಹಿತಿ ಸಿಕ್ಕಿದ್ದು ಅವುಗಳನ್ನು ವಶಕ್ಕೆ ಪಡೆದು ಪರಿಶೀಲನೆ ನಡೆಸಿದಾಗ ಅದರಲ್ಲಿ 6 ಡೆಬಿಟ್ ಕಾರ್ಡ್‍ಗಳು, 2 ನಕಲಿ ಸಿಮ್ ಕಾರ್ಡ್‍ಗಳು ದೊರೆತಿವೆ.
ಆರೋಪಿಗಳನ್ನು ವಿಚಾರಣೆ ಮಾಡಲಾಗಿ ಈ ನಕಲಿ ಸಿಮ್ ಕಾರ್ಡ್ ಬಳಸಿಕೊಂಡು ದೇಶದ ವಿವಿಧ ರಾಜ್ಯಗಳ ಸಾರ್ವಜನಿಕರಿಗೆ ಉದ್ಯೋಗ,ಸಾಲ ಕೊಡಿಸುವುದಾಗಿ, ಲಾಟರಿ, ಗಿಫ್ಟ್ ಬಂದಿದೆ ಎಂದು ಆಸೆ ಹುಟ್ಟುವ ಕರೆಮಾಡಿ ಹಾಗು ಸಂದೇಶಗಳನ್ನು ಕಳುಹಿಸಿ ನಂತರ ಸಾರ್ವಜನಿಕರಿಂದ ನಕಲಿ ಬ್ಯಾಂಕ್ ಖಾತೆಗಳಿಗೆ ಆನ್‍ಲೈನ್ ಮುಖಾಂತರ ಹಣವನ್ನು ಹಾಕಿಸಿಕೊಂಡು ಮೋಸಮಾಡುತ್ತಿದ್ದರು.
ಇದರಿಂದ ಪೊಲೀಸರಿಗೆ ಆರೋಪಿಗಳನ್ನು ಪತ್ತೆಮಾಡಲು ಹಾಗು ಬಂಧಿಸಲು ಕಷ್ಟಸಾಧ್ಯವನ್ನು ಉಂಟುಮಾಡುತ್ತಿದ್ದು, ತನಿಖೆಯಿಂದ ತಿಳಿದುಬಂದಿದೆ.
ಆರೊಪಿಗಳ ವಿಳಾಸದ ಬಗ್ಗೆ ವಿಚಾರಿಸಿದಾಗ ಸ್ಥಳದ ವಿಳಾಸವನ್ನು ತಿಳಿಸಿರುವುದಿಲ್ಲ. ಇವರಿಬ್ಬರ ಪಾಸ್‍ಪೊರ್ಟ್ ಹಾಗು ವೀಸಾ ಇರುವುದಿಲ್ಲ, ಆದರೂ ದೇಶದಲ್ಲಿ ಅನಧಿಕೃತವಾಗಿ ವಾಸವಾಗಿರುವುದು ತಿಳಿದುಬಂದಿದೆ. ಈ ಇಬ್ಬರ ಬಂಧನದಿಂದ ಸಾರ್ವಜನಿಕರಿಗೆ ಆಗುತ್ತಿದ್ದ ಸೈಬರ್ ವಂಚನೆ ಅಪರಾಧಗಳನ್ನು ತಡೆಯುವಲ್ಲಿ ಸಿಇಎನ್ ಪೊಲೀಸ್ ಇನ್ಸ್‌ಪೆಕ್ಟರ್ ಸಂತೋಷ್ ರಾಮ್.ಆರ್ ಮತ್ತವರ ಸಿಬ್ಬಂದಿ ಯಶಸ್ವಿಯಾಗಿದ್ದಾರೆ ಎಂದು ತಿಳಿಸಿದರು.