ವಾಷಿಂಗ್ಟನ್: ಅಮೆರಿಕದ ಸಾಮಾಜಿಕ ಮತ್ತು ಆರ್ಥಿಕ ವ್ಯವಸ್ಥೆಯಲ್ಲಿ ಭಾರತೀಯ ಮೂಲದವರು ಹಾಗೂ ಹಿಂದೂ ಧರ್ಮೀಯರ ಪ್ರಾಬಲ್ಯ ದಿನೇ ದಿನೇ ಹೆಚ್ಚುತ್ತಿದೆ. ಇತ್ತೀಚಿನ ‘ಪ್ಯೂ ರಿಸರ್ಚ್ ಸೆಂಟರ್’ ವರದಿಯ ಪ್ರಕಾರ, ಅಮೆರಿಕದಲ್ಲಿ ವಾಸಿಸುವ ವಿವಿಧ ಧರ್ಮೀಯರ ಪೈಕಿ ಹಿಂದೂಗಳು ಅತ್ಯಂತ ಹೆಚ್ಚು ಶೈಕ್ಷಣಿಕ ಅರ್ಹತೆ ಹೊಂದಿರುವ ಸಮುದಾಯವಾಗಿ ಹೊರಹೊಮ್ಮಿದ್ದಾರೆ.
ಅಮೆರಿಕದಲ್ಲಿರುವ ಹಿಂದೂಗಳಲ್ಲಿ ಶೇಕಡಾ 77ರಷ್ಟು ಜನರು ಪದವಿ ಅಥವಾ ಅದಕ್ಕಿಂತ ಹೆಚ್ಚಿನ ಉನ್ನತ ಶಿಕ್ಷಣವನ್ನು ಪಡೆದಿದ್ದು, ಇದು ದೇಶದ ಇತರ ಎಲ್ಲಾ ಧಾರ್ಮಿಕ ಸಮುದಾಯಗಳಿಗಿಂತ ಗಮನಾರ್ಹವಾಗಿ ಹೆಚ್ಚಿನದಾಗಿದೆ. ಹಿಂದೂಗಳ ನಂತರ ಯಹೂದಿ ಸಮುದಾಯದವರು ಶೇಕಡಾ 59ರಷ್ಟು ಪದವೀಧರರನ್ನು ಹೊಂದುವ ಮೂಲಕ ಎರಡನೇ ಸ್ಥಾನದಲ್ಲಿದ್ದಾರೆ. ಮುಸ್ಲಿಂ ಸಮುದಾಯದವರೂ ಸಹ ಶಿಕ್ಷಣದಲ್ಲಿ ಉತ್ತಮ ಸಾಧನೆ ಮಾಡುತ್ತಿದ್ದು, ಅಮೆರಿಕದ ಸರಾಸರಿ ಶೈಕ್ಷಣಿಕ ಮಟ್ಟಕ್ಕಿಂತ ಮೇಲಿದ್ದಾರೆ. ವರದಿಯ ಪ್ರಕಾರ ಮುಸ್ಲಿಂ ಸಮುದಾಯದ ಶೇಕಡಾ 39ರಷ್ಟು ಜನರು ಪದವಿ ಶಿಕ್ಷಣವನ್ನು ಪೂರೈಸಿದ್ದಾರೆ.
ಹೆಚ್ಚಿನ ಶೈಕ್ಷಣಿಕ ಅರ್ಹತೆಯು ಸಹಜವಾಗಿಯೇ ಈ ಸಮುದಾಯಗಳ ಆರ್ಥಿಕ ಸ್ಥಿತಿಯನ್ನು ಉತ್ತಮಪಡಿಸಿದೆ. ಅಮೆರಿಕದ ಅತಿ ಹೆಚ್ಚು ವಾರ್ಷಿಕ ಆದಾಯ ಗಳಿಸುವ ಕುಟುಂಬಗಳ ಪೈಕಿ ಹಿಂದೂ ಕುಟುಂಬಗಳು ಮುಂಚೂಣಿಯಲ್ಲಿವೆ ಎಂದು ಈ ಸಂಶೋಧನೆ ದೃಢಪಡಿಸಿದೆ. ಅಮೆರಿಕದಲ್ಲಿ ನೆಲೆಸಿರುವ ಹಿಂದೂಗಳಲ್ಲಿ ಹೆಚ್ಚಿನವರು ಭಾರತದಿಂದ ವಲಸೆ ಹೋದವರಾಗಿದ್ದು, ಅವರು ಸಾಫ್ಟ್ವೇರ್ ಎಂಜಿನಿಯರಿಂಗ್, ವೈದ್ಯಕೀಯ ಮತ್ತು ತಂತ್ರಜ್ಞಾನ ವಲಯಗಳಲ್ಲಿ ಪ್ರಮುಖ ಪಾತ್ರ ವಹಿಸುತ್ತಿದ್ದಾರೆ.
ಅಮೆರಿಕದ ಕಟ್ಟುನಿಟ್ಟಿನ ವೀಸಾ ನಿಯಮಗಳು ಮತ್ತು ಕೌಶಲ್ಯ ಆಧಾರಿತ ವಲಸೆ ಪದ್ಧತಿಯಿಂದಾಗಿ, ಭಾರತದ ಅತಿ ಹೆಚ್ಚು ಸುಶಿಕ್ಷಿತರು ಅಲ್ಲಿಗೆ ತೆರಳುತ್ತಿರುವುದು ಈ ಅಂಕಿಅಂಶಗಳಿಗೆ ಪ್ರಮುಖ ಕಾರಣವಾಗಿದೆ. ಅಮೆರಿಕದ ಒಟ್ಟಾರೆ ಜನಸಂಖ್ಯೆಯಲ್ಲಿ ಹಿಂದೂಗಳ ಪಾಲು ಶೇಕಡಾ 1ಕ್ಕಿಂತ ಕಡಿಮೆ ಇದ್ದರೂ, ದೇಶದ ಆರ್ಥಿಕತೆ ಮತ್ತು ಬೌದ್ಧಿಕ ಬೆಳವಣಿಗೆಗೆ ಅವರು ನೀಡುತ್ತಿರುವ ಕೊಡುಗೆ ಅಪಾರ ಎಂದು ತಜ್ಞರು ವಿಶ್ಲೇಷಿಸಿದ್ದಾರೆ.
