ಜಪಾನ್: ಪ್ರೀತಿ ಮತ್ತು ಮಮತೆಗೆ ಭಾಷೆಯ ಹಂಗಿಲ್ಲ, ಅದು ಪ್ರಾಣಿಗಳಿಗೂ ಅಷ್ಟೇ ಮುಖ್ಯ ಎಂಬುದಕ್ಕೆ ಜಪಾನ್ನ ಮೃಗಾಲಯವೊಂದರ ಈ ಘಟನೆ ಸಾಕ್ಷಿಯಾಗಿದೆ. ತನ್ನ ಹೆತ್ತ ತಾಯಿಯಿಂದಲೇ ತಿರಸ್ಕರಿಸಲ್ಪಟ್ಟು, ಒಂಟಿತನದಿಂದ ಬಳಲುತ್ತಿದ್ದ ‘ಪಂಚ್’ ಎಂಬ ಪುಟಾಣಿ ಮಂಗನ ಮರಿಯ ಜೀವನದ ಕಥೆ ಈಗ ಇಂಟರ್ನೆಟ್ನಲ್ಲಿ ಸಂಚಲನ ಮೂಡಿಸುತ್ತಿದೆ.
ಜಪಾನ್ನ ಇಚಿಕಾವಾ ಸಿಟಿ ಮೃಗಾಲಯದಲ್ಲಿ ಜನಿಸಿದ ಪಂಚ್ಗೆ ಹುಟ್ಟಿದ ಕೆಲವೇ ದಿನಗಳಲ್ಲಿ ತಾಯಿಯ ಪ್ರೀತಿ ದೂರವಾಯಿತು. ಯಾವುದೋ ಕಾರಣಕ್ಕೆ ಪಂಚ್ನನ್ನು ಅವನ ತಾಯಿ ಸ್ವೀಕರಿಸಲು ನಿರಾಕರಿಸಿತು. ಪ್ರಾಣಿ ಲೋಕದ ಈ ಕಹಿ ಸತ್ಯ ಪಂಚ್ನನ್ನು ಸಂಪೂರ್ಣವಾಗಿ ಏಕಾಂಗಿಯನ್ನಾಗಿಸಿತು. ಇತರ ಮಂಗಗಳ ಜೊತೆ ಬೆರೆಯಲು ಆತನಿಂದ ಸಾಧ್ಯವಾಗಲಿಲ್ಲ.
ಪಂಚ್ನ ಈ ದಯನೀಯ ಸ್ಥಿತಿ ಕಂಡ ಮೃಗಾಲಯದ ಸಿಬ್ಬಂದಿ, ಅವನಿಗೆ ಸಾಂತ್ವನ ನೀಡಲು ಒಂದು ಮೃದುವಾದ ಕಿತ್ತಳೆ ಬಣ್ಣದ ಬೊಂಬೆಯನ್ನು ನೀಡಿದರು. ಅಚ್ಚರಿಯೆಂದರೆ, ಪಂಚ್ ಆ ಬೊಂಬೆಯನ್ನೇ ತನ್ನ ತಾಯಿ ಎಂದು ಭಾವಿಸಿದ. ಅಲ್ಲಿಂದ ಶುರುವಾಯಿತು ಈ ಇಬ್ಬರ ಅಪರೂಪದ ಸ್ನೇಹ. ದೊಡ್ಡ ಮಂಗಗಳು ಬೆದರಿಸಿದಾಗ ಅಥವಾ ಭಯವಾದಾಗ ಪಂಚ್ ತಕ್ಷಣ ಓಡಿ ಹೋಗಿ ಬೊಂಬೆಯನ್ನು ಗಟ್ಟಿಯಾಗಿ ಅಪ್ಪಿಕೊಳ್ಳುತ್ತಾನೆ. ತಿನ್ನುವಾಗ, ಮಲಗುವಾಗ ಈ ಬೊಂಬೆ ಇಲ್ಲದೆ ಪಂಚ್ಗೆ ಒಂದು ಕ್ಷಣವೂ ಕಳೆಯಲು ಸಾಧ್ಯವಿಲ್ಲ. ತಾಯಿ ನೀಡಬೇಕಾದ ಬೆಚ್ಚಗಿನ ಅಪ್ಪುಗೆಯನ್ನು ಆತ ಈ ಬೊಂಬೆಯಲ್ಲೇ ಕಾಣುತ್ತಿದ್ದಾನೆ.
ಸಾಮಾಜಿಕ ಜಾಲತಾಣಗಳಲ್ಲಿ ಪಂಚ್ನ ಈ ವಿಡಿಯೋಗಳನ್ನು ಕಂಡು ನೆಟ್ಟಿಗರು ಭಾವುಕರಾಗಿದ್ದಾರೆ. “ಈ ಪುಟಾಣಿ ಮಂಗನ ಸಂಕಟ ಯಾರಿಗೂ ಬೇಡ, ಅನಾಥ ಮರಿಗೆ ಬೊಂಬೆಯೇ ಆಸರೆಯಾಗಿದ್ದು ನೋಡಿ ಮನಸ್ಸಿಗೆ ಭಾರವಾಗುತ್ತಿದೆ” ಎಂದು ಜನರು ಕಮೆಂಟ್ ಮಾಡುತ್ತಿದ್ದಾರೆ. ಇತ್ತೀಚಿನ ವರದಿಗಳ ಪ್ರಕಾರ, ಮೃಗಾಲಯದ ಇತರ ಮಂಗಗಳು ನಿಧಾನವಾಗಿ ಪಂಚ್ನನ್ನು ತಮ್ಮ ಗುಂಪಿಗೆ ಸೇರಿಸಿಕೊಳ್ಳಲು ಪ್ರಯತ್ನಿಸುತ್ತಿವೆ, ಆದರೂ ಬೊಂಬೆಯ ಮೇಲಿನ ಅವನ ಪ್ರೀತಿ ಮಾತ್ರ ಕಡಿಮೆಯಾಗಿಲ್ಲ.
