ಡಿಸೆಂಬರ್ 21, 2018 ಇಡೀ ವಿಶ್ವವೇ ಸ್ಯಾನ್ಡಲ್ವುಡ್ ನೆಡೆ ತಿರುಗಿ ನೋಡಿದ ದಿನ. ಕಾರಣ, ಅಂದು ಹೊಂಬಾಳೆ ಪ್ರೊಡಕ್ಷನ್ಸ್ ಅಡಿಯಲ್ಲಿ ಪ್ರಶಾಂತ್ ನೀಲ್ ನಿರ್ದೇಶನದ, ವಿಜಯ್ ಕಿರಗಂದೂರ್ ನಿರ್ಮಾಣದ, ರಾಕಿಂಗ್ ಸ್ಟಾರ್ ಯಶ್ ಅಭಿನಯದ KGF ಬಿಡುಗಡೆಗೊಂಡಿತ್ತು. ಚಿತ್ರವನ್ನು ನೋಡಿ ಮೆಚ್ಚಿದ ಸಿನಿಪ್ರಿಯರು, ಚಿತ್ರಕ್ಕೆ ಭರ್ಜರಿ ಯಶಸ್ಸನ್ನು ತಂದುಕೊಟ್ಟಿದ್ದರು. ಅದೇ ಗುಂಗಲ್ಲಿ, ಮತ್ತಷ್ಟು ಹೆಚ್ಚಿನ ನಿರೀಕ್ಷೆಯೊಂದಿಗೆ ಕೆ.ಜಿ.ಎಫ್ – 2 ಗಾಗಿ ಕಾತರದಿಂದ ಕಾಯುತ್ತಿದ್ದ ಅಭಿಮಾನಿಗಳ ಕಾಯುವಿಕೆ ಅಂತ್ಯಗೊಂಡಿದ್ದು 2022 ರ ಏಪ್ರಿಲ್ 14 ರಂದು ಕೆ.ಜಿ.ಎಫ್ – 2 ಬಿಡುಗಡೆಯಾದಾಗ. ಸಂಜಯ್ ದತ್, ರವೀನಾ ಟಂಡನ್ ಸೇರಿದಂತೆ ದೊಡ್ಡ ತಾರಾಗಣ, ಮಾಸ್ ಡೈಲಾಗ್ಸ್, ಸಂಗೀತ, ಉತ್ತಮ ಹೊಂದಿದ್ದ ಈ ಚಿತ್ರ ಅಭಿಮಾನಿಗಳ ನಿರೀಕ್ಷೆಯನ್ನು ಮೀರಿಸಿ ದೇಶದೆಲ್ಲೆಡೆ ಸೂಪರ್ ಹಿಟ್ ಆಗಿತ್ತು. ಇದೀಗ ಕೆ.ಜಿ.ಎಫ್ – 3 ಗಾಗಿ ಕಾಯುತ್ತಿರುವ ಪ್ರೇಕ್ಷಕ ವರ್ಗಕ್ಕೆ ಚಿತ್ರತಂಡ ನೀಡಿದ ಸುದ್ದಿ ತುಸು ಬೇಸರವನ್ನೇ ತಂದಿದೆ ಎನ್ನಬಹುದು.
ಇತ್ತೀಚೆಗಿನ ಸಂದರ್ಶನವೊಂದರಲ್ಲಿ, ನಿರ್ಮಾಪಕ ವಿಜಯ ಕಿರಗಂದೂರ್ ಹೇಳಿರುವ ಪ್ರಕಾರ 2025 ರಲ್ಲಿ KGF3 ರ ಚಿತ್ರೀಕರಣ ಆರಂಭವಾಗಲಿದೆ. ನಿರ್ದೇಶಕ ಪ್ರಶಾಂತ್ ನೀಲ್ ಹಾಗೂ ಹೊಂಬಾಳೆ ಪ್ರೊಡಕ್ಷನ್ಸ್ ಬೇರೆ ಚಿತ್ರಗಳ ಚಿತ್ರೀಕರಣದಲ್ಲಿ ವ್ಯಸ್ತರಾಗಿರುವ ಕಾರಣ 2025 ರ ಮೊದಲು ಚಿತ್ರ ಸೆಟ್ಟೇರಲು ಸಾಧ್ಯವೇ ಇಲ್ಲ. 2026 ರಲ್ಲಿ ಕೆ.ಜಿ.ಎಫ್ -3 ಅನ್ನು ತೆರೆಯ ಮೇಲೆ ನೋಡಬಹುದು ಎಂದಿದ್ದಾರೆ. ಜೊತೆಗೆ, ಕೆ.ಜಿ.ಎಫ್ ಕಥೆಯನ್ನು ಅನ್ನು ಇನ್ನಷ್ಟು ಸೀರೀಸ್ ವರೆಗೂ ವಿಸ್ತರಿಸುವ ಯೋಚನೆ ಇದೆಯಂತೆ. ಆದರೆ, ಕೆ.ಜಿ.ಎಫ್ – 5 ರ ನಂತರ ರಾಕಿಂಗ್ ಸ್ಟಾರ್ Yash ಬದಲಾಗಿ ರಾಕಿ ಭಾಯ್ ಪಾತ್ರದಲ್ಲಿ ಬೇರೆ ನಾಯಕ ನಟನನ್ನು ನಿರೀಕ್ಷಿಸಬಹುದು. ಜೇಮ್ಸ್ ಬಾಂಡ್ ಸೀರೀಸ್ ನಂತೆ ನಾಯಕರು ಬದಲಾಗುತ್ತಾ ಹೋಗುತ್ತಾರೆ ಎಂಬ ಸುಳಿವನ್ನು ಬಿಟ್ಟುಕೊಟ್ಟಿದ್ದಾರೆ.
ಜನವರಿ ೮ರಂದು ತಮ್ಮ 37ನೇ ಹುಟ್ಟು ಹಬ್ಬವನ್ನು ಆಚರಿಸಿಕೊಂಡ ನಟ ಯಶ್, ಅಭಿಮಾನಿಗಳಿಗಾಗಿ ಪತ್ರವೊಂದನ್ನು ಬರೆದಿದ್ದಾರೆ. ಅದರಿಂದ ಆಯ್ದ ಕೆಲವು ಸಾಲುಗಳು ಇಂತಿವೆ. “ನಾನು ಬಹುವಾಗಿ ನಂಬುವ ಮತ್ತು ಇಷ್ಟಪಡುವ ಕಾರ್ಯವೊಂದರ ಕೊನೆಯ ಹಂತದಲ್ಲಿದ್ದೇನೆ. ನನ್ನ ಬೆನ್ನೆಲುಬು ಮತ್ತು ಶಕ್ತಿಯಾಗಿರುವ ನೀವೇ ನನಗೆ ಸಾಧಿಸಲು ಸ್ಫೂರ್ತಿ . ಮುಂದಿನ ಬಾರಿ ನಿಮ್ಮನ್ನು ಭೇಟಿಯಾದಾಗ ಎಲ್ಲವನ್ನೂ ನಿಮ್ಮೊಂದಿಗೆ ಹಂಚಿಕೊಳ್ಳುತ್ತೇನೆ. ಆದರೆ ಅದಕ್ಕೆ ನನಗೆ ಸ್ವಲ್ಪ ಸಮಯ ಬೇಕು. ಹಾಗಾಗಿ, ಈ ಬಾರಿ ನಿಮ್ಮಿಂದ ಒಂದು ವಿಶೇಷವಾದ ಉಡುಗೊರೆಯನ್ನು ಬೇಡಲಿಚ್ಛಿಸುತ್ತೇನೆ. ಅದುವೇ ನಿಮ್ಮ ತಾಳ್ಮೆ ಮತ್ತು ಅರ್ಥೈಸುವಿಕೆ.”
ಹಾಗಾಗಿ ಕೆ.ಜಿ.ಎಫ್ – 3 ನೋಡಲು 2026 ರ ವರೆಗೆ ಕಾಯಲೇಬೇಕು.
