ಕಠ್ಮಂಡು: ನೇಪಾಳ ವಿಮಾನ ದುರಂತದಲ್ಲಿ ಮೃತಪಟ್ಟ 22 ಪ್ರಯಾಣಿಕರು ಹಾಗು ಸಿಬ್ಬಂದಿ ಪೈಕಿ 14 ಶವಗಳು ಪತ್ತೆಯಾಗಿವೆ.
ನಾಲ್ವರು ಭಾರತೀಯರು ಸೇರಿದಂತೆ 22 ಮಂದಿಯಿದ್ದ ನೇಪಾಳದ ಪುಟ್ಟ ಪ್ರಯಾಣಿಕ ವಿಮಾನ ಭಾನುವಾರ ಪತನಗೊಂಡು ವಿಮಾನದಲ್ಲಿದ್ದ 22 ಮಂದಿಯೂ ಸಾವನ್ನಪ್ಪಿದ್ದರು. ಇದೀಗ ಈ ವಿಮಾನದ ಭಗ್ನಾವಶೇಷಗಳಿಂದ 14 ಶವಗಳನ್ನು ಹೊರತೆಗೆಯುವಲ್ಲಿ ರಕ್ಷಣಾ ಪಡೆ ಯಶಸ್ವಿಯಾಗಿದೆ ಎಂದು ವರದಿಯಾಗಿದೆ.
ಈ ವಿಚಾರವಾಗಿ ಮಾತನಾಡಿದ ವಕ್ತಾರ ದಿಯೋ ಚಂದ್ರಲಾಲ್ ಕರ್ನ್, ಇಲ್ಲಿ ಹವಾಮಾನ ವೈಪರೀತ್ಯದಿಂದಾಗಿ ವಿಮಾನಗಳ ಹಾರಾಟ ಸಾಧ್ಯವಿಲ್ಲ. ಆದರೂ ರಕ್ಷಣಾ ಪಡೆ ಘಟನಾ ಸ್ಥಳ ತಲುಪುವಲ್ಲಿ ಯಶಸ್ವಿಯಾಗಿದ್ದು ಈಗಾಗಲೇ 14 ಶವಗಳನ್ನು ಹೊರತೆಗೆದಿದ್ದೇವೆ ಎಂದು ಹೇಳಿದ್ದಾರೆ.
ವಾಯವ್ಯ ನೇಪಾಳದ ಮಸ್ತಾಂಗ್ ಜಿಲ್ಲೆಯ ತಾಸಾರ್ನ ಸಾನೋ ಸ್ವಾರೆ ಭೀರ್ ಎಂಬಲ್ಲಿ ಈ ವಿಮಾನವು ಪತನಗೊಂಡಿತ್ತು.
