ಚಾಮರಾಜನಗರ: ರಾತ್ರಿ ವೇಳೆ 3 ಜಿಂಕೆಗಳನ್ನು ಬೇಟೆಯಾಡಿ ಮಾಂಸವನ್ನು ಪಾಲು ಮಾಡಿಕೊಳ್ಳುವಾಗ ಬೇಟೆಗಾರರು ಸಿಕ್ಕಿಬಿದ್ದಿರುವ ಘಟನೆ ಹನೂರು ತಾಲೂಕಿನ ಉದ್ದನೂರು ಗ್ರಾಮದ ತೋಟದ ಮನೆಯಲ್ಲಿ ನಡೆದಿದೆ.
ಲಕ್ಷ್ಮಣ (55), ಮುತ್ತಪ್ಪ(40), ಮುತ್ತುರಾಜ್(35), ಪೆರಿಯಣ್ಣ(23), ಗೋವಿಂದರಾಜು (27 ಬಂಧಿತ ಬೇಟೆಗಾರರಾಗಿದ್ದು ಸತೀಶ್ ಎಂಬಾತ ತಲೆ ಮರೆಸಿಕೊಂಡಿದ್ದಾನೆ. ಮಲೆಮಹದೇಶ್ವರ ವನ್ಯಜೀವಿಧಾಮದ ಹನೂರು ಗಸ್ತಿನ ಬೆಳ್ಳತ್ತೂರು ಗುಡ್ಡ ಕಾಡಿನಲ್ಲಿ ಈ ಆರು ಮಂದಿ ನಾಡ ಬಂದೂಕಿನಿಂದ 3 ಜಿಂಕೆಗಳನ್ನು ಬೇಟೆಯಾಡಿ ತೋಟದ ಮನೆಗೆ ತಂದು ಪಾಲು ಹಾಕುತ್ತಿದ್ದಾಗ ಅರಣ್ಯಾಧಿಕಾರಿಗಳು ದಾಳಿ ನಡೆಸಿ ಬಂಧಿಸಿದ್ದಾರೆ.
ಬಂಧಿತರಿಂದ ಜಿಂಕೆ ಮಾಂಸ, ಚರ್ಮ, 2 ಬೈಕ್, 2 ನಾಡ ಬಂದೂಕುಗಳನ್ನು ವಶಪಡಿಸಿಕೊಂಡಿದ್ದು ಆರೋಪಿಗಳನ್ನು ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಲಾಗಿದೆ.
