ಸನ್ ರೈಸರ್ಸ್ ಮೇಲೆ ವಾರ್ನರ್ – ಪೊವೆಲ್ ಸವಾರಿ

ಮುಂಬಯಿ: ಗುರುವಾರ ರಾತ್ರಿ ಇಲ್ಲಿ ನಡೆದ ಟಾಟಾ ಐಪಿಎಲ್ ಪಂದ್ಯಾವಳಿಯ 50ನೇ ಪಂದ್ಯದಲ್ಲಿ ಡೇವಿಡ್ ವಾರ್ನರ್ ಮತ್ತು ರೋಮನ್ ಪೊವೆಲ್ ಸಾಹಸದ ಫಲವಾಗಿ ಡೆಲ್ಲಿ ಕ್ಯಾಪಿಟಲ್ಸ್ ತಂಡವು ಸನ್ ರೈಸರ್ಸ್ ಹೈದರಾಬಾದ್ ವಿರುದ್ಧ 21 ರನ್ ಗಳ ಭರ್ಜರಿ ಜಯ ಸಂಪಾಡಿಸಿದೆ.
ಟಾಸ್ ಗೆದ್ದ ಹೈದರಾಬಾದ್ ಫೀಲ್ಡಿಂಗ್ ಆಯ್ದುಕೊಂಡಿತ್ತು. ಡೆಲ್ಲಿ 35 ರನ್ ಆಗುವಷ್ಟರಲ್ಲಿ 2 ವಿಕೆಟ್ ಕಳೆದುಕೊಂಡು ಸಂಕಷ್ಟದಲ್ಲಿತ್ತು. ಈ ವೇಳೆ ಕ್ರೀಸಿಗೆ ಬಂದ ನಾಯಕ ಪಂತ್ ಇನ್ನಿಂಗ್ಸ್ ಗೆ ಬಿರುಸು ನೀಡಿ, ಕೇವಲ 16 ಎಸೆತಗಳಲ್ಲಿ 3 ಸಿಕ್ಸರ್ ಹಾಗೂ 1 ಬೌಂಡರಿ ಉಳ್ಳ 26 ರನ್ ಗಳಿಸಿ ನಿರ್ಗಮಿಸಿದರು. ಬಳಿಕ ವಾರ್ನರ್ ಅವರನ್ನು ಕೂಡಿಕೊಂಡ ಪೊವೆಲ್ ಮುರಿಯದ ನಾಲ್ಕನೇ ವಿಕೆಟ್ ಗೆ 117 ರನ್ ಕಲೆಹಾಕಿದರು. ವಾರ್ನರ್ 58 ಎಸೆತಗಳಲ್ಲಿ 12 ಬೌಂಡರಿ, 3 ಸಿಕ್ಸರ್ ಸಹಿತ 92 ರನ್, ಪೊವೆಲ್ 35 ಎಸೆತಗಳಲ್ಲಿ 6 ಸಿಕ್ಸರ್, 3 ಬೌಂಡರಿ ಸಹಿತ 67 ರನ್ ಗಳಿಸಿದರು. ಡೆಲ್ಲಿ 3 ವಿಕೆಟ್ ನಷ್ಟಕ್ಕೆ 207 ರನ್ ಗಳ ಭರ್ಜರಿ ಮೊತ್ತವನ್ನು ಸಂಪಾಡಿಸಿತು.
ಹೈದರಾಬಾದ್ ಆರಂಭದಲ್ಲೇ ಮುಗ್ಗರಿಸಿ, ಮೂರು ವಿಕೆಟ್ ಕಳೆದಕೊಂಡಿತು. ತ್ರಿಪಾಠಿ (22), ಮಾರ್ಕ್ ರಾಮ್ (25 ಎಸೆತಗಳಲ್ಲಿ 42 ರನ್, 4 ಬೌಂಡರಿ, 3 ಸಿಕ್ಸರ್) ಮತ್ತು ನಿಕೋಲಸ್ ಪೂರನ್ (34 ಎಸೆತ, 63 ರನ್, 6 ಸಿಕ್ಸರ್, 2 ಬೌಂಡರಿ) ಗೆಲುವಿನ ಆಸೆ ಮೂಡಿಸಿದರೂ ಮತ್ತೊಂದು ಕಡೆಯಿಂದ ತಂಡವು ವಿಕೆಟ್ ಕಳೆದುಕೊಳ್ಳುತ್ತಾ ಸಾಗಿ ಹಿಂದುಳಿಯಿತು. ಹೀಗಾಗಿ, ನಿಗದಿತ ಓವರ್ ಗಳು ಮುಗಿದಾಗ ಹೈದರಾಬಾದ್ 8 ವಿಕೆಟ್ ನಷ್ಟಕ್ಕೆ 186 ರನ್ ಗಳಿಸಲಷ್ಟೇ ಶಕ್ತವಾಯಿತು. ಖಲೀಲ್ ಅಹಮದ್ 3, ಶಾರ್ದೂಲ್ ಠಾಕೂರ್ 2 ವಿಕೆಟ್ ಗಳಿಸಿದರು. ವಾರ್ನರ್ ಪಂದ್ಯಶ್ರೇಷ್ಠ ಪ್ರಶಸ್ತಿ ಗಳಿಸಿದರು.