ಚಾಮರಾಜನಗರ: ಲಾಂಗು, ಮಚ್ಚುಗಳ ಭರಾಟೆ, ಪ್ರೀತಿ-ಪ್ರೇಮದ ಆಧುನಿಕ ಚಿತ್ರಗಳ ನಡುವೆ ಕ್ಲಾಸಿಕ್ ಸಿನಿಮಾಗಳು ಅದರಲ್ಲೂ ವರನಟ ಡಾ.ರಾಜಕುಮಾರ್ ಚಿತ್ರಗಳು ಎಲ್ಲರನ್ನೂ ಸೆಳೆಯುತ್ತಿವೆ ಎಂಬುದಕ್ಕೆ ಈ ಯುವಕನೇ ಸಾಕ್ಷಿ.
ಹೌದು… ಚಾಮರಾಜನಗರ ರಾಮಸಮುದ್ರದ ಮಂಜು ಎಂಬ ಯುವಕ ದಿನಕ್ಕೊಂದು ಅಣ್ಣಾವ್ರ ಚಿತ್ರಗಳ ಡೈಲಾಗ್ ಗಳನ್ನು ಕಲಿಯುತ್ತಿದ್ದು ಅಣ್ಣಾವ್ರ ಶಾರೀರ, ಸ್ಪಷ್ಟತೆ, ಶಬ್ಧಗಳ ಏರಿಳಿತದಲ್ಲೇ ಹೇಳುವ ಮೂಲಕ ಗಮನ ಸೆಳೆಯುತ್ತಿದ್ದಾನೆ. ಜೊತೆಗೆ, ಅಣ್ಣಾವ್ರ ಹಾಡುಗಳು ಈತನಿಗೆ ಕಂಠಪಾಠವಾಗಿದೆ.
ಈತನ ಇಡೀ ಕುಟುಂಬವೇ ರಾಜ್ ಅಭಿಮಾನಿಯಾಗಿದ್ದು ಮಂಜು ರಸಗೊಬ್ಬರ ಮಳಿಗೆಯೊಂದರಲ್ಲಿ ನೌಕರಿ ಹಿಡಿದಿದ್ದು ಅಣ್ಣಾವ್ರ ಚಿತ್ರ ನೋಡುವ ಹವ್ಯಾಸ ಈಗ ಡೈಲಾಗ್ ಕಂಠಪಾಠ ಮಾಡುವಷ್ಟರ ಮಟ್ಟಿಗೆ ಬಂದು ನಿಂತಿದೆ. ಬಿಡುವಿನ ವೇಳೆಯಲ್ಲಿ ರಾಜ್ ಚಿತ್ರಗಳನ್ನು ಹಾಕಿಕೊಂಡು ಡೈಲಾಗ್ ಅಭ್ಯಾಸ ಮಾಡಲಿದ್ದು ಥೇಟ್ ಅಣ್ಣಾವ್ರನಂತೆ ಮಾಡಲಿದ್ದಾನೆ ಮಂಜು.
ಕವಿರತ್ನ ಕಾಳಿದಾಸ, ಭಕ್ತ ಕುಂಬಾರ, ಭಕ್ತ ಪ್ರಹ್ಲಾದ, ಆಕಸ್ಮಿಕ, ದೇವತಾ ಮನುಷ್ಯ, ಸಂಪತ್ತಿಗೆ ಸವಾಲ್ ಹೀಗೆ ಸಾಲು ಸಾಲು ಚಿತ್ರಗಳ ಡೈಲಾಗ್ ಗಳು ಕಂಠಪಾಠವಾಗಿದೆ. ಇಷ್ಟೇ ಅಲ್ಲದೇ, ಪೌರಾಣಿಕ ಚಿತ್ರಗಳನ್ನು ನಾಟಕದ ಪಟ್ಟುಗಳಂತೆ ಹೇಳಲಿದ್ದು ಈತನ ಕಲಾಪ್ರೇಮಕ್ಕೊಂದು ವೇದಿಕೆ ಅಗತ್ಯವಿದೆ.
ಅಣ್ಣಾವ್ರ ಚಿತ್ರಗಳೇ ಪ್ರೇರಣೆ: ತನಗೆ ಡೈಲಾಗ್ ಆಗಲಿ, ಹಾಡಾಗಲಿ ಯಾರೂ ಹೇಳಿಕೊಟ್ಟಿಲ್ಲ, ಅಣ್ಣಾವ್ರ ಚಿತ್ರ ನೋಡುತ್ತಾ ನೋಡುತ್ತಾ ತಾನೆ ಕಲಿತೆ. ದಿನಕ್ಕೊಮ್ಕೆಯಾದರೂ ರಾಜ್ ಚಿತ್ರ ನೋಡುತ್ತಾ ಒಂದು ಡೈಲಾಗ್ ಅಭ್ಯಾಸ ಮಾಡುತ್ತೇನೆ, ನನ್ನ ಇಡೀ ಕುಟುಂಬವೇ ಅಣ್ಣಾವ್ರ ಅಪ್ಪಟ ಅಭಿಮಾನಿ, ನನ್ನ ಡೈಲಾಗ್ ಗಳನ್ನು ಕೇಳಿ ಮನೆಯವರು, ಸ್ನೇಹಿತರು ಮೆಚ್ಚುಗೆ ವ್ಯಕ್ತಪಡಿಸುತ್ತಾರೆ ಎಂದು ಮಂಜು ಹೇಳಿದರು.
