ಆತ ಸ್ನೇಹಿತನ ಪತ್ನಿ ಮೇಲೆ ಕಣ್ಣು ಹಾಕಿದ್ದ, ಆಕೆ ಸ್ನೇಹಿತೆಯ ಪತಿಯ ಜೊತೆ ಲವ್ವಿ ಡವ್ವಿ ಶುರು ಮಾಡಿದ್ದಳು. ಕದ್ದು ಮುಚ್ಚಿ ಸೇರುತ್ತಿದ್ದವರು ಕೆಲ ದಿನಗಳಿಂದ ನಾಪತ್ತೆಯಾಗಿದ್ದರು. ಹೀಗೆ ನಾಪತ್ತೆಯಾದವರು ಹೆಣವಾಗಿ ಪತ್ತೆಯಾಗಿದ್ದಾರೆ.
ಒಂದು ಕಡೆ ಮರಳ ರಾಶಿಯಲ್ಲಿ ಹುದುಗಿ ಹೋಗಿದ್ದ ಒಂದು ಶವ. ಮರದಲ್ಲಿ ನೇತಾಡುತ್ತಿದ್ದ ಮತ್ತೊಂದು ಶವ. ಇಂತಹ ಭೀಬತ್ಸ ದೃಶ್ಯ ಕಂಡು ಬಂದಿದ್ದು. ಮೈಸೂರು ಜಿಲ್ಲೆ ಟಿ ನರಸೀಪುರ ತಾಲ್ಲೂಕಿನ ತಲಕಾಡು ಹೊರವಲಯದಲ್ಲಿ. ಹೀಗೆ ಆತ್ಮಹತ್ಯೆಗೆ ಶರಣಾದವರು ಸಿದ್ದರಾಜು ಹಾಗು ಸುಮಿತ್ರ. ಇವರಿಬ್ಬರು ಟಿ. ನರಸೀಪುರ ತಾಲೂಕಿನ ಎಂ.ಕೆಬ್ಬೆಹುಂಡಿ ಗ್ರಾಮದವರು. ಸಿದ್ದರಾಜುಗೆ ಮದುವೆಯಾಗಿ ಇಬ್ಬರು ಮಕ್ಕಳಿದ್ಧಾರೆ.
ಸಿದ್ಧರಾಜು ಕೂಲಿ ಕೆಲಸ ಮಾಡಿಕೊಂಡು ಸಂಸಾರ ನಡೆಸುತ್ತಿದ್ದ. ಈತನ ಪತ್ನಿ ಲಿವರ್ ಸಮಸ್ಯೆಯಿಂದ ಬಳಲುತ್ತಿದ್ದಳು. ಇನ್ನು ಸುಮಿತ್ರಗೂ ಮದುವೆಯಾಗಿತ್ತು. ಸುಮಿತ್ರಾ ಪತಿ ರವಿ ಹಾಗು ಸಿದ್ಧರಾಜು ಇಬ್ಬರು ಸ್ನೇಹಿತರಾಗಿದ್ದರು
ರವಿ ಮನೆಗೆ ಸಿದ್ಧರಾಜು ಆಗಾಗ ಹೋಗಿ ಬರುತ್ತಿದ್ದ. ಕಳೆದ ಆರು ತಿಂಗಳಿನಿಂದ ಸುಮಿತ್ರ ಜೊತೆ ಸಿದ್ದರಾಜು ಅಕ್ರಮ ಸಂಬಂದ ಬೆಳೆಸಿದ್ದ. ಸಿದ್ದರಾಜು ಜೊತೆ ಪ್ರತಿನಿತ್ಯ ಫೋನ್ ಮೂಲಕ ಮಾತುಕತೆ ನಡೆಸುತ್ತಿದ್ದಳು. ಈ ವಿಚಾರ ಸಿದ್ದರಾಜು ಪತ್ನಿಗೆ ಗೊತ್ತಾಗಿದೆ. ಆಗ ಸಿದ್ದರಾಜು ನನ್ನ ವಿಚಾರಕ್ಕೆ ಬರಬೇಡ ಎಂದು ಗದರಿದ್ದಾನೆ. ಕೆಲ ದಿನಗಳ ಹಿಂದೆ ಎರಡು ಮನೆಯವರ ನಡುವೆ ಇದೇ ವಿಚಾರಕ್ಕೆ ಜಗಳವಾಗಿದೆ.
ಇದಾದ ನಂತರವು ಸಿದ್ದರಾಜು ಸುಮಿತ್ರಾ ಸಂಬಂಧ ಮುಂದುವರೆದಿದೆ. ಗಲಾಟೆ ನಂತರ ಸಿದ್ದರಾಜು ಮೈಸೂರಿನ ಹಳೇ ಕೆಸರೆಯಲ್ಲಿ ಸುಮಿತ್ರಗೆ ಬಾಡಿಗೆ ಮನೆ ಮಾಡಿಸಿದ್ದ. ಅಷ್ಟೇ ಅಲ್ಲ ನರಸೀಪುರದ ಗಾರ್ಮೆಂಟ್ಸ್ ನಲ್ಲಿ ಕೆಲಸ ಕೊಡಿಸಿದ್ದ. ಕೆಲಸಕ್ಕೆ ಹೋಗುತ್ತೇನೆಂದು ಸುಮಿತ್ರ ಪ್ರತಿನಿತ್ಯ ಸಿದ್ದರಾಜು ಜೊತೆ ಸುತ್ತಾಟ ನಡೆಸುತ್ತಿದ್ದಳು.
ಸುಮಿತ್ರ ಹಾಗು ಸಿದ್ಧರಾಜು ಹಲವು ದಿನಗಳಿಂದ ಮನೆ ಬಿಟ್ಟು ಹೋಗಿದ್ದರು. ಕಳೆದ ಶನಿವಾರ ಇಬ್ಬರು ಟಿ.ನರಸೀಪುರದ ತಲಕಾಡಿನ ನಿಸರ್ಗಧಾಮಕ್ಕೆ ಹೋಗಿದ್ದಾರೆ. ನಿಸರ್ಗಧಾಮದ ಕಾಡಿನೊಳಗೆ ಹೋಗಿರುವಾಗ ಸಿದ್ದರಾಜು ನೀರು ತರುತ್ತೇನೆಂದು ಹೊರ ಬಂದಿದ್ದಾನೆ. ವಾಪಸ್ಸು ಬರುವಷ್ಟರಲ್ಲಿ ಸುಮಿತ್ರ ಸಾವನ್ನಪ್ಪಿದ್ದಳಂತೆ. ಈ ಬಗ್ಗೆ ಸಿದ್ದರಾಜು ಸೇಹಿತ ನಿಂಗರಾಜುಗೆ ವಾಟ್ಸಾಪ್ ಮೂಲಕ ಮೇಸೆಜ್ ಕಳುಹಿಸಿದ್ದಾನೆ. ಸುಮಿತ್ರ ದೇಹವನ್ನ ಮಣ್ಣು ಮಾಡಿ ನಾನು ಆತ್ಮಹತ್ಯೆ ಮಾಡಿಕೊಳ್ಳುತ್ತಿರುವುದಾಗಿ ಮೇಸೆಜ್ ನಲ್ಲಿ ತಿಳಿಸಿದ್ದಾನೆ. ತಕ್ಷಣ ನಿಂಗರಾಜು ತಲಕಾಡು ಪೊಲೀಸರಿಗೆ ವಿಚಾರ ತಿಳಿಸಿದ್ದಾನೆ. ಪೊಲೀಸರು ಹೋಗುವಷ್ಟರಲ್ಲಿ ಸಿದ್ದರಾಜು ಮರಕ್ಕೆ ನೇಣು ಬಿಗಿದುಕೊಂಡು ಆತ್ಮಹತ್ಯೆಗೆ ಶರಣಾಗಿದ್ದ. ಶ್ವಾನಗಳ ಮೂಲಕ ಮರಳಲ್ಲಿ ಹುದುಗಿ ಹೋಗಿದ್ದ ಶವವನ್ನು ಪೊಲೀಸರು ಪತ್ತೆ ಹಚ್ಚಿದ್ದಾರೆ.
