ಬೆಂಗಳೂರು, ಫೆ.13- ವಿದೇಶಿ ಉಡುಗೊರೆಯ ಆಮಿಷಕ್ಕೆ ಬಲಿಯಾದ ಬೆಂಗಳೂರಿನ ವಿದ್ಯಾವಂತ ಮಹಿಳೆಯೊಬ್ಬರು ಸುಮಾರು 31 ಲಕ್ಷ ರು ಹಣ ಕಳೆದು ಕೊಂಡು ನಗರ ಪೊಲೀಸರ ಮೊರೆ ಹೋಗಿದ್ದಾರೆ.
ಜಯನಗರ (Jayanagar) 3ನೇ ಬ್ಲಾಕ್ನ ನಿವಾಸಿ ಅನುಪಮಾ ಕಿರಣ್ ಎಂಬುವರು ತಮಗೆ ಮೋಸ ಮಾಡಲಾಗಿದೆ. ವಂಚಕರ ಮಾತು ನಂಬಿ ಮೋಸ ಹೋಗಿದ್ದೇನೆ ಎಂದು ದೂರು ದಾಖಲಿಸಿದ್ದಾರೆ.
ಲಕ್ಕಿ ಡ್ರಾ ಮೂಲಕ ತಮ್ಮ ಹೆಸರು ಆಯ್ಕೆಯಾಗಿದೆ. ಹೀಗಾಗಿ ತಾವು ನಿಮಗೆ 5 ಕೋಟಿ ಅಮೆರಿಕನ್ ಡಾಲರ್ ಉಡುಗೊರೆ ನೀಡುವುದಾಗಿ ಇಮೇಲ್ ಬಂದ ಬಳಿಕ ಮಹಿಳೆ ಹಣ ಕಳೆದುಕೊಂಡಿದ್ದಾರೆ.
ಕಳೆದ ವರ್ಷ ಡಿಸೆಂಬರ್ 12ರಂದು ತನಗೆ ಇಮೇಲ್ ಬಂದಿದ್ದು, ಸುಮಾರು 5 ಕೋಟಿ ಅಮೆರಿಕನ್ ಡಾಲರ್ ಗಿಫ್ಟ್ ಗೆದ್ದಿರುವುದಾಗಿ ತಿಳಿಸಿದ್ದರು. ಆಕೆಗೆ ನವದೆಹಲಿಯಲ್ಲಿರುವ ಯುಎಸ್ ರಾಯಭಾರ ಕಚೇರಿಯಿಂದ ರೇಮಂಡ್ ಆಸ್ಟಿನ್ ಎಂದು ಹೇಳಿಕೊಳ್ಳುವ ಒಬ್ಬ ಆರೋಪಿಯಿಂದ ಕರೆ ಬಂದಿದೆ. ಉಡುಗೊರೆಯನ್ನು ಪಡೆಯಲು ಶುಲ್ಕ ಪಾವತಿಸಲು ಅವರು ರಾಯಭಾರ ಕಚೇರಿಯಿಂದ ಇಮೇಲ್ ಸಂದೇಶ ಬರಲಿದೆ ಅದರ ಮಾರ್ಗ ಸೂಚಿಯನ್ನು ತಾವು ಪಾಲಿಸಬೇಕು ಎಂದು ಹೇಳಿದರು.
ಅದರಂತೆ ರಾಯಭಾರ ಕಚೇರಿಯ ಅಧಿಕಾರಿ ಎಂದು ಹೇಳಲಾದ ವ್ಯಕ್ತಿಯ ಮಾತಿನಂತೆ ಹದಿನೈದು ದಿನಗಳಲ್ಲಿ, ಆರೋಪಿಯು ವಿವಿಧ ರೀತಿಯ ಶುಲ್ಕಗಳಿಗೆ ಹಣವನ್ನು ವರ್ಗಾಯಿಸುವಂತೆ ಮಾಡಿದನು.
ಸುಮಾರು ಎರಡು ತಿಂಗಳ ಕಾಲ ಈ ಹಗರಣವು ಹಂತ ಹಂತವಾಗಿ ನಡೆದಿದ್ದು, ಆ ಸಮಯದಲ್ಲಿ ಆರೋಪಿಯು ಹಣವನ್ನು ವಿವಿಧ ರೀತಿಯ ಶುಲ್ಕಗಳಿಗಾಗಿ ವರ್ಗಾಯಿಸಿದ್ದಾಗಿ ತಿಳಿಸಿದ್ದಾರೆ. ಒಬ್ಬ ಆರೋಪಿಯು ಆಕೆಯ ಮನೆಗೆ ಭೇಟಿ ಕೂಡ ನೀಡಿದ್ದನು.
ಆರೋಪಿಗಳಲ್ಲಿ ಒಬ್ಬರು ಆಕೆಯ ಮನೆಗೆ ಭೇಟಿ ನೀಡಿ ವಿದೇಶಿ ಕರೆನ್ಸಿ ನೋಟುಗಳು ಅಸಲಿಯೇ ಎಂದು ಪರಿಶೀಲಿಸಲು ಕರೆನ್ಸಿ ನೀಡಿದ್ದಾರೆ. ಅನುಪಮಾ ಕರೆನ್ಸಿಯನ್ನು ಬ್ಯಾಂಕ್ ಮತ್ತು ವಿದೇಶಿ ವಿನಿಮಯ ಶಾಖೆಗೆ ಕೊಂಡೊಯ್ದರು, ಅದು ಒರಿಜಿನಲ್ ಹಣ ಎಂದು ದೃಢಪಟ್ಟಿತು.
ಡಿಸೆಂಬರ್ 28 ರಂದು, ಗುಣ ಎಂದು ಹೇಳಿಕೊಳ್ಳುವ ವ್ಯಕ್ತಿಯೊಬ್ಬರು ಆಕೆಯ ಮನೆಯ ಬಳಿಗೆ ಬಂದು ಕೆಲವು ಡಾಲರ್ ನೀಡಿದರು. ಡಾಲರ್ ನಿಜವೇ ಎಂದು ಪರಿಶೀಲಿಸುವಂತೆ ಕೇಳಿದರು. ಡಾಲರ್ಗಳು ಅಸಲಿ ಎಂದು ತಿಳಿದ ನಂತರ, ಅವಳು ಅವುಗಳನ್ನು ಹಣ ವಿನಿಮಯ ಕೇಂದ್ರದಲ್ಲಿ ರೂಪಾಯಿಗಳಿಗೆ ಬದಲಾಯಿಸಿದ್ದಾರೆ.
ಆಕೆ ಅವರಿಂದ ಸುಮಾರು 45,000 ರೂ ಹಣ ಪಡೆದ ನಂತರ, ಅನುಪಮಾ ಅವರನ್ನು ಕುರುಡಾಗಿ ನಂಬಿದ್ದಾರೆ. ಅದಾದ ನಂತರ ಸುಮಾರು 31 ಲಕ್ಷ ರೂ ಕಳೆದುಕೊಂಡಿದ್ದಾರೆ ಎಂದು ಅಧಿಕಾರಿಯೊಬ್ಬರು ಹೇಳಿದರು.
ಗಿಫ್ಟ್ ಹಣ ನೀಡಲು ಬರುವಾಗ ತಾನು ಪೊಲೀಸರಿಗೆ ಸಿಕ್ಕಿಬಿದ್ದಿದ್ದು, ಸಿಬಿಐ ಕ್ಲಿಯರೆನ್ಸ್ ಶುಲ್ಕ, ತನಿಖಾಧಿಕಾರಿ ಶುಲ್ಕ ಮತ್ತು ಕಸ್ಟಮ್ಸ್ ಕ್ಲಿಯರೆನ್ಸ್ ಪಾವತಿಸದಿದ್ದರೆ ತೊಂದರೆಯಾಗುತ್ತದೆ ಎಂದು ವಂಚಕರು ಆಕೆಗೆ ಬ್ಲ್ಯಾಕ್ ಮೇಲ್ ಮಾಡಿ ಹಣ ವಸೂಲಿ ಮಾಡಿದ್ದಾರೆ.
