ಒಡಿಶಾ: ಆನೆಯೊಂದು ವೃದ್ಧೆಯನ್ನು ತುಳಿದು ಗಾಯಗೊಳಿಸಿದ್ದಲ್ಲದೆ, ಬಳಿಕ ಮೃತಪಟ್ಟ ಆಕೆಯ ಅಂತ್ಯಕ್ರಿಯೆಗೂ ಅಡ್ಡಪಡಿಸಿದ ಘಟನೆ ಒಡಿಶಾದ ಮಯೂಭಂಜ್ ಜಿಲ್ಲೆಯಲ್ಲಿ ನಡೆದಿದೆ.
ಜೂನ್ 10ರಂದೇ ಈ ಘಟನೆ ನಡೆದಿದ್ದು, ತಡವಾಗಿ ಬೆಳಕಿಗೆ ಬಂದಿದೆ.
ರಾಯ್ಪಾಲ್ ನಿವಾಸಿಯಾಗಿದ್ದ ಮಾಯಾ ಶರ್ಮಾ ಎಂಬ 70 ವರ್ಷದ ವೃದ್ಧೆಯ ಮೇಲೆ ಆನೆಯು ದಾಳಿ ಮಾಡಿತ್ತು.
ಗಂಭೀರ ಸ್ಥಿತಿಯಲ್ಲಿದ್ದ ವೃದ್ಧೆಯನ್ನು ಆಸ್ಪತ್ರೆಗೆ ಸಾಗಿಸಲಾಯಿತಾದರೂ ಅವರು ಚಿಕಿತ್ಸೆ ಫಲಕಾರಿಯಾಗದೇ ಮೃತಪಟ್ಟಿದ್ದರು. ಕುಟುಂಬಸ್ಥರು ವೃದ್ಧೆಯ ಶವವನ್ನು ಮನೆಗೆ ಕೊಂಡೊಯ್ದು ಅಂತ್ಯಕ್ರಿಯೆಗೆ ತಯಾರಿ ನಡೆಸುತ್ತಿದ್ದ ವೇಳೆ ಮತ್ತೆ ಬಂದ ಆನೆಯು ಶವವನ್ನು ತುಳಿದು ಹಾಕಿದೆ. ಅಂತ್ಯಕ್ರಿಯೆಯಲ್ಲಿ ಭಾಗಿಯಾಗಿದ್ದ ಗ್ರಾಮಸ್ಥರು ಆನೆಯ ಆಕ್ರೋಶ ಕಂಡು ದಿಕ್ಕಾಪಾಲಾಗಿ ಓಡಿದ್ದಾರೆ.
ಆನೆಯು ಶವವನ್ನು ಸೊಂಡಿಲಿನಿಂದ ಎತ್ತಿ ಬಿಸಾಡಿದ್ದಲ್ಲದೇ ವೃದ್ಧೆಯ ಮನೆಯನ್ನು ಸಂಪೂರ್ಣವಾಗಿ ನಾಶ ಮಾಡಿದೆ.
