ಕೊಲೆಗಾರರ ಬಂಧನ

ಬೆಂಗಳೂರು,7-ಮನೆಯಲ್ಲಿ ಯಾರೂ ಇಲ್ಲದ ಸಮಯದಲ್ಲಿ ಎಲೆಕ್ಟ್ರಿಕಲ್ ಉಪಕರಣಗಳ ಅಂಗಡಿಯ ವೃದ್ಧ ಮಾಲೀಕನನ್ನು ಕೊಲೆಗೈದು ಭಾರಿ ಮೊತ್ತದ ಹಣ ಹಾಗೂ ಅಪಾರ ಪ್ರಮಾಣದ ಚಿನ್ನಾಭರಣಗಳನ್ನು ದೋಚಿ ಪರಾರಿಯಾಗಿದ್ದ ಪ್ರಮುಖ ಆರೋಪಿ ಜೊತೆಗೆ ಇನ್ನು ನಾಲ್ವರನ್ನು ಬಂಧಿಸಿ‌ರುವ ಚಾಮರಾಜಪೇಟೆ ಪೊಲೀಸರು 4ಕೋಟಿ 93 ಲಕ್ಷ 80 ಸಾವಿರ ಮೌಲ್ಯದ ನಗದು ಚಿನ್ನ ಬೆಳ್ಳಿ ಆಭರಣಗಳನ್ನು ವಶಪಕೊಂಡಿದ್ದಾರೆ.
ಪ್ರಮುಖ ಆರೋಪಿ ಬಿಜಾರಾಮ್ ಜೊತೆಗೆ ಪೂರನ್ ರಾಮ್(26)ಮಹೇಂದ್ರ ದೇವಸಿ(35)ಹಾಗೂ ಓಂಪ್ರಕಾಶ್ ದೇವಸಿ (26)ಬಂಧಿಸಿ 53 ಲಕ್ಷ 48 ಲಕ್ಷ ನಗದು ಸೇರಿ 4ಕೋಟಿ 93 ಲಕ್ಷ 80 ಸಾವಿರ ಮೌಲ್ಯದ 8ಕೆಜಿ 752 ಗ್ರಾಂ ಚಿನ್ನಾಭರಣಗಳು 3ಕೆಜಿ ,870ಗ್ರಾಂ ಬೆಳ್ಳಿ ಗಟ್ಟಿಗಳನ್ನು ವಶಪಡಿಸಿಕೊಂಡು ಹೆಚ್ಚಿನ ತನಿಖೆಯನ್ನು ಕೈಗೊಳ್ಳಲಾಗಿದೆ ಎಂದು ನಗರ ಪೊಲೀಸ್ ಆಯುಕ್ತ ಪ್ರತಾಪ್ ರೆಡ್ಡಿ ಅವರು ಪತ್ರಿಕಾಗೋಷ್ಠಿಯಲ್ಲಿ ತಿಳಿಸಿದರು.
ಆರೋಪಿ ಬಿಜುರಾಮ್ ಕಳೆದ 6 ತಿಂಗಳಿಂದ ಜುಗ್‍ರಾಜ್ ಜೈನ್ ಅವರ ಚಿಕ್ಕಪೇಟೆಯಲ್ಲಿರುವ ದೀಪಂ ಎಲೆಕ್ಟ್ರಿಕಲ್ಸ್ ಅಂಗಡಿ ಮತ್ತು ಚಾಮರಾಜಪೇಟೆಯ ಮನೆಯಲ್ಲಿ ಕೆಲಸ ಮಾಡಿಕೊಂಡಿದ್ದು
ಕಳೆದ ಮೇ25 ರಂದು ಜುಗ್‍ರಾಜ್ ಜೈನ್ ರವರ ಮನೆಯಲ್ಲಿ ಯಾರೂ ಇಲ್ಲದ ವೇಳೆ ತನ್ನ ಸಹಚರರು ಜೊತೆ ಸೇರಿ ಜುಗ್‍ರಾಜ್ ಜೈನ್ ರವರು ಒಬ್ಬರೇ ಇರುವುದನ್ನು ತಿಳಿದು 2 ದಿನಗಳಿಂದ ಸಂಚು ರೂಪಿಸಿ ಮೇ 24 ರಂದು ರಾತ್ರಿ 9-30ರ ವೇಳೆ ಅವರ ಕಣ್ಣಿಗೆ ಖಾರದ ಪುಡಿ ಎರಚಿ, ಬಾಯಿಗೆ ಬಟ್ಟೆ ತುರುಕಿ, ಎರಡು ಕೈಗಳನ್ನು ಬೆನ್ನಿನ ಹಿಂದಕ್ಕೆ ಪ್ಲಾಸ್ಟಿಕ್ ದಾರದಿಂದ ಕಟ್ಟಿ, ಕುತ್ತಿಗೆಯನ್ನು ಹಿಸುಕಿ ಕೊಲೆ ಮಾಡಿದ್ದ.
ಮನೆಯಲ್ಲಿದ್ದ ಸುಮಾರು 15 ಕೆಜಿ ತೂಕದಷ್ಟು ಚಿನ್ನ ಮತ್ತು ಬೆಳ್ಳಿ ಆಭರಣಗಳು, ನಗದು ಹಣ 60 ಲಕ್ಷ ರೂಗಳನ್ನು ಆರೋಪಿ ಬಿಜಾರಾಮ್ ಮತ್ತು ಆತನ ಸಹಚರ ಓಂ ರಾಮ್ ದೇವಸಿ ರವರು ಕಳ್ಳತನ ಮಾಡಿಕೊಂಡು ಹೋಗಿದ್ದು ಈ ಬಗ್ಗೆ ಚಾಮರಾಜಪೇಟೆ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು.
ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿ ವಿಶೇಷ ಪೊಲೀಸ್ ತಂಡಗಳನ್ನು ರಚಿಸಿ ಕಾರ್ಯಾಚರಣೆ ಕೈಗೊಂಡ ಬೆನ್ನಲ್ಲೇ ಮೇ 29ರಂದು ಗುಜರಾತ್ ನ ಅಮೀರ್ ಗಢ ಠಾಣೆಯ ಪೊಲೀಸರ ಸಹಕಾರದಿಂದ ಆರೋಪಿ ಬಿಜಾರಾಮ್ ನನ್ನು ಬಂಧಿಸಲಾಗಿತ್ತು ಎಂದರು.
ಬಳಿಕ ಆತ ವಿಚಾರಣೆಯಲ್ಲಿ ನೀಡಿದ ಮಾಹಿತಿ ಆಧರಿಸಿ ಮೂರನೇ ಪೂರನ್ ರಾಮ್ ದೇವಸಿನನ್ನು ಗೋವಾದ ಆತನ ನಿವಾಸದಲ್ಲಿ ವಶಕ್ಕೆ ಪಡೆದು ಈತನಿಂದ ಕಳವು ಮಾಲುಗಳನ್ನು ವಶಪಡಿಸಿಕೊಳ್ಳಲಾಗಿದೆ ಎಂದರು.
ಬಳಿಕ ಇವರಿಬ್ಬರೂ ವಿಚಾರಣೆ ನಡೆಸಿ ಮಾಹಿತಿಯನ್ನು ಪಡೆದು ಮಹೇಂದ್ರ ದೇವಸಿ ಹಾಗೂ ಓಂ ಪ್ರಕಾಶ್ ದೇವಸಿ ರವರನ್ನು, ರಾಜಸ್ಥಾನದ ಕಿವಲಿ ಗ್ರಾಮದ ಮನೆಯಲ್ಲಿ ಬಂಧಿಸಿ ಉಳಿದ ಮಾಲುಗಳನ್ನು ವಶಪಡಿಸಿಕೊಳ್ಳಲಾಗಿದೆ ಎಂದರು.
ಕಾರ್ಯಾಚರಣೆಯನ್ನು ಚಾಮರಾಜಪೇಟೆ ಪೊಲೀಸ್ ಇನ್ಸ್‌ಪೆಕ್ಟರ್ ಎರ್ರಿಸ್ವಾಮಿ ಅವರನ್ನೂಳಗೊಂಡ ಡಿಸಿಪಿ ಡಾ.ಸಂಜೀವ್ ಪಾಟೀಲ್ ನೇತೃತ್ವದ ವಿಶೇಷ ತಂಡ ನಡೆಸಿದೆ ಎಂದು ಅವರು ತಿಳಿಸಿದರು.