ಮಚ್ಚು-ಲಾಂಗ್ ಹಿಡಿದು ಹೊಡೆದಾಟ..

ಬೆಂಗಳೂರು,ಜು.10-ಪುಡಿ ರೌಡಿಗಳು ಮಚ್ಚು-ಲಾಂಗು ಹಿಡಿದು ರಸ್ತೆಗಿಳಿದು ಪುಂಡಾಟ ನಡೆಸುತ್ತಾ ಸಾರ್ವಜನಿಕರಿಗೆ ತೊಂದರೆ ನೀಡಿದ ಘಟನೆ ಹೊಸಕೆರೆಹಳ್ಳಿ ಬಳಿ ನಡೆದಿದೆ.
ಕುಡಿದ ಮತ್ತಿನಲ್ಲಿ ಹೊಸಕೆರೆಹಳ್ಳಿಯ ರೋಟಿ ಲ್ಯಾಂಡ್ ಡಾಬಾ ಬಳಿ ಗಲಾಟೆ ಮಾಡಿದ್ದಾರೆ. ಬಳಿಕ ಪಕ್ಕದಲ್ಲಿ ನಿಂತಿದ್ದ ಯುವಕನಿಗೆ ಮಚ್ಚು ತೋರಿಸಿ, ಮೊಬೈಲ್ ಕಿತ್ತುಕೊಂಡು ಪರಾರಿಯಾಗಿದ್ದಾರೆ.
ಈ ಬಗ್ಗೆ ಸ್ಥಳೀಯ ಪೊಲೀಸ್​ ಠಾಣೆಗೆ ದೂರು ನೀಡಿದರೂ ಪೊಲೀಸರು ಸ್ಥಳಕ್ಕೆ ಬಂದಿಲ್ಲ. ಘಟನೆ ನಡೆದು ಪುಡಿರೌಡಿಗಳು ಹೋಗುವವರೆಗೂ ಗಿರಿನಗರ ಪೊಲೀಸರು ಸ್ಥಳಕ್ಕೆ ಬಂದಿಲ್ಲ.
ಹೊಸಕೆರೆಹಳ್ಳಿ ರೋಟಿ ಲ್ಯಾಂಡ್ ಡಾಬಾ ಸಾಕಷ್ಟು ದಿನದಿಂದ ಪುಡಿರೌಡಿಗಳ, ಪುಂಡರ ನೆಚ್ಚಿನ ತಾಣವಾಗಿದೆ. ಈ ಬಗ್ಗೆ ಸಾರ್ವಜನಿಕರು ಮಾಹಿತಿ ನೀಡಿದರೂ ಪೊಲೀಸರು ಮಾತ್ರ ತಲೆಕೆಡಿಸಿಕೊಳ್ಳುತ್ತಿಲ್ಲ. ಸದ್ಯ ರೋಟಿ ಲ್ಯಾಂಡ್ ಡಾಬಾದ ಸಿಸಿಟಿವಿಯ ಡಿವಿಆರ್ ಅನ್ನು ಪೊಲೀಸರು ವಶಕ್ಕೆ ಪಡೆದು ಪುಂಡರಿಗೆ ಬಲೆ ಬೀಸಿದ್ದಾರೆ.