ಕೊರೊನಾಗಿಂತ ಹೆಚ್ಚು ಅಪಾಯಕಾರಿಯಾದ Marburg ವೈರಸ್ ಪತ್ತೆ – ದೃಢಪಡಿಸಿದ WHO

PC – BBC

ಕೋವಿಡ್ ನ ಕರಾಳ ದಿನಗಳು ಕಳೆದು, ಜೀವನ ಸಹಜ ಸ್ಥಿತಿಗೆ ಮರಳುತ್ತಿದೆ. ಜನರು ಸಮಾಧಾನದ ನಿಟ್ಟುಸಿರು ಬಿಡುತ್ತಿರುವ ಹೊತ್ತಲ್ಲೆ, ವಿಶ್ವ ಆರೋಗ್ಯ ಸಂಸ್ಥೆ (WHO) ಸ್ಪಷ್ಟಪಡಿಸಿದ ಸುದ್ದಿಯೊಂದು ಮತ್ತೆ ಆತಂಕ ಹುಟ್ಟಿಸಿದೆ.

ಆಫ್ರಿಕಾದ ಈಕ್ವಟೋರಿಯಲ್ ಗಿನಿಯಲ್ಲಿ (Equatorial Guinea, Africa) ಎಬೋಲಾ ವೈರಸ್ (Ebola virus) ಕುಟುಂಬಕ್ಕೆ ಸೇರಿದ ಮಾರ್ಬರ್ಗ್ ವೈರಸ್ (Marburg virus) ಪತ್ತೆಯಾಗಿದ್ದನ್ನು WHO ದೃಢಪಡಿಸಿದೆ. ಈ ಸೋಂಕಿನ ಗುಣಲಕ್ಷಣಗಳನ್ನು ಹೊಂದಿದ್ದ 9 ಜನರು ಈಗಾಗಲೇ ಸಾವನ್ನಪ್ಪಿದ್ದಾರೆ. ಮೃತ ಪಟ್ಟ 9 ಜನರಲ್ಲಿ ಒಬ್ಬರಲ್ಲಿ ಮಾರ್ಬರ್ಗ್ ಸೋಂಕು ದೃಢಪಟ್ಟಿದೆ. 16 ಜನರಲ್ಲಿ ಸೋಂಕಿನ ಲಕ್ಷಣಗಳು ಕಂಡುಬಂದಿವೆ. ಪ್ರಾಥಮಿಕ ಸಂಪರ್ಕ ಹೊಂದಿದ್ದ 21 ಜನರನ್ನು ಗೃಹ ಬಂಧನದಲ್ಲಿರಿಸಲಾಗಿದೆ ಎಂದು ವರದಿಯಾಗಿದೆ.

ಏನಿದು ಮಾರ್ಬರ್ಗ್ ವೈರಸ್? 

ಮಾರ್ಬರ್ಗ್ ವೈರಸ್ ಎಬೋಲಾ ವೈರಸ್ ಕುಟುಂಬಕ್ಕೆ ಸೇರಿದ RNA ವೈರಸ್. ಇದರಿಂದ ಉಂಟಾಗುವ ಸೋಂಕಿಗೆ ಮಾರ್ಬರ್ಗ್ ಸೋಂಕು (Marburg disease) ಎನ್ನುತ್ತಾರೆ. ಎಬೋಲಾದಂತೆ, ಮಾರ್ಬರ್ಗ್ ವೈರಸ್ ಬಾವಲಿ (bats) ಗಳಲ್ಲಿ ಹುಟ್ಟುತ್ತದೆ.

ಮಾರ್ಬರ್ಗ್ ಸೋಂಕು ಎಷ್ಟು ಅಪಾಯಕಾರಿ? 

ಇದು ಒಂದು ಅಪರೂಪದ ಸೋಂಕಾದರೂ, ಭೀಕರ ಸಾವಿನ ಪ್ರಾಮಾಣವನ್ನು ಹೊಂದಿದೆ. ವರದಿಯ ಪ್ರಕಾರ, ಇದು 88% ವರೆಗಿನ ಸಾವಿನ ಅನುಪಾತವನ್ನು ಹೊಂದಿದೆ.

ಇದರ ಲಕ್ಷಣಗಳು

WHO ಪ್ರಕಾರ, ಹೆಚ್ಚು ತಾಪಮಾನದ ಜ್ವರ, ತೀವ್ರ ತಲೆನೋವು ಮತ್ತು ತೀವ್ರ ಅಸ್ವಸ್ಥತೆ ಈ ಸೋಂಕಿನ ಲಕ್ಷಣಗಳಾಗಿವೆ. ಮತ್ತು, ಇವು ಧಿಡೀರನೆ ಕಾಣಿಸಿಕೊಳ್ಳಬಹುದು ಎಂದೂ ತಿಳಿಸಿದೆ. ಇತರ ಸಾಮಾನ್ಯ ಲಕ್ಷಣಗಳೆಂದರೆ ಸ್ನಾಯು ನೋವು, ಹೊಟ್ಟೆ ನೋವು ಮತ್ತು ಸೆಳೆತ, ವಾಕರಿಕೆ, ವಾಂತಿ ಮತ್ತು ಅತಿಸಾರ.

ಇದು ಸಾಂಕ್ರಾಮಿಕವೇ?

ಹೌದು. ಇದು ಒಬ್ಬರಿಂದ ಒಬ್ಬರಿಗೆ ಹರಡುತ್ತದೆ. ಸೋಂಕಿತ ಜನರ ರಕ್ತ, ಅಂಗಗಳು ಅಥವಾ ಇತರ ದೈಹಿಕ ದ್ರವಗಳ ನೇರ ಸಂಪರ್ಕದ ಮೂಲಕ ಮತ್ತು ಕಲುಷಿತ ಮೇಲ್ಮೈಗಳು ಮತ್ತು ವಸ್ತುಗಳಿಂದ ಜನರ ನಡುವೆ ವೈರಸ್ ಹರಡಬಹುದು.

ಚಿಕಿತ್ಸೆ

WHO ಹೇಳುವಂತೆ, ಪ್ರಸ್ತುತದಲ್ಲಿ ಈ ಸೋಂಕನ್ನು ನಿವಾರಿಸುವ ಯಾವ ವ್ಯಾಕ್ಸಿನ್ ಗಳೂ ಲಭ್ಯವಿಲ್ಲ. ದೇಹವನ್ನು ಪುನರ್ಜಲೀಕರಣ ಗೊಳಿಸುವುದು, ಆಮ್ಲಜನಕದ ಮಟ್ಟವನ್ನು ನಿರ್ವಹಿಸುವುದು ಮತ್ತು ನಿರ್ದಿಷ್ಟ ರೋಗಲಕ್ಷಣಗಳಿಗೆ ಚಿಕಿತ್ಸೆ ನೀಡುವುದಷ್ಟೇ ಸದ್ಯಕ್ಕಿರುವ ಚಿಕಿತ್ಸೆ ಎನ್ನುತ್ತದೆ WHO.